News Feed

• HealthropApril 16, 2024
  Healthrop
• ThomasbaxFebruary 28, 2024
  Thomasbax
• LunmijoFebruary 26, 2024
  Lunmijo

ITI Veng Chanchin

-H.Vanlalrawna

I.T.I Veng chanchin hi thui tak ziah tur a awm a, amaherawhchu tun tumah hian thil dang kara zeh ve mai tura buatsaih a nih avangin kimchanga ziah theih a ni lova, chhiartu te pawhin kan hriatthiam ka beisei. Kan veng chhungah hian Sorkar leh mimal hmun hma langsar leh lar tak tak an awm ve nual a, amaherawhchu I.T.I Veng lo pian chhoh dan bakah mipui nawlpui khawih deuh bika ka ngaih thil Ihenkhat ka thlur bik a; tin, kan Veng tana sul lo sutu te an ngaihsanawm em avangin, lhangtharte’n kan hriat zui theih nan chu lam chu ka thlur deuh a, hruaitu hmasate hming chu a theih chin china ka tarlang a, tuna kan khawtlang hruaitute hi chu lhangthar te rawn ziak veah ka dah ta a ni. Thangkhat lian zet kalta thil engemawzat ka ziak a, minute bu leh I.T.I Veng chanchin ziahna lehkhabu te keuvin, upa deuhte kawmin ka rawn bawk a, a dik thei angbera tura theih tawp chhuaha ka buatsaih a ni.

Mizorama Industrial Training Institute dinna tura ruahmanna bawhzuiin kum 1964 khan I.T.I staff quarter sak tum a ni a, chakte lam khawmin a ban turte pawh duan a ni. Nimahsela 1966-ah ram a buai zui tak avangin hmalakna a chawl zui ta a. Srikona, Cachar-ah I.T.I, Mizoram chu 1964-ah hawn a ni tawh a, buai reh hnua building pawimawhte sak chhunzawma peih a nih hnuin, kum 1975 March thla khan Cachar alangin I.T.I chu rawn suan chhoh a ni ta chauh a ni. I.T.I hawn tirh hian Electrician, Wireman, Fitter, Motor Mechanic leh Welder trade-te a awm a, Principal hmasaber chu Pu P.R Das a ni.

Kum 1964-a I.T.I staff quarter sak bullan hnu lawkah Ex-Hav.Thanseia(L) H/o Khawvelthangi te chuan tuna an awmna hmun hi an dil avangin sorkarin a pe a. In sa nghalin hemi kum hian an sa zova, kum leh 1965 kumthar-ah an luah a, hemi kum hian Pu C.Thanchungnunga(L) W/o C.Kapmawii ten inhmun hmu ve lehin an rawn awm ve leh ta a, Pu Thangkhama (TKA) chuan Lawibuala a sangha dil siam a rawn awmchilh zui ta bawk a. Buai kum tak khan Upa L.Kamlova(L) F/o C.Thanchungnunga te chhung lo pem lutin a fapa Pu C.Thanchungnunga te’n an in an pem san chu an rawn luah zui a. Ram buai hnuah Pu Chhawnlova MM (L), Pu Lalmanga (L) leh Pu C.Biakmawia te 1973-ah rawn pem lutin, Pu Taikawlha (L) F/o Pi Nuhliri leh Pu Kapzauva te’n kum 1974-ah an rawn zawm ve leh a, midang rawn awm belh zelin veng lian leh pawimawh tak a lo ni chho ta ani. I.T.I_Vengah chuan Lawibual ram hi mimal ram neih hmasa ber nia hriat a ni a, chu chu Thakthingveng ram a nih lai a ni. Mimalin an neih hma daih, hman laiin helai kawr ruamah hian Lawi an inbual thin a, chu chu hmingah a pui zui ta a ni.

I.T.I Veng awmna ram hi a tirah chuan Mau Huan tia hriat a ni thin a, Sorkarin Technical lam Zirna In sakna atan a ruahman a, hei vang hian ‘Technical Mual’ tih a ni. Industrial Training Institute chauh lo, Polytechnic Zirna In sakna atan tuna Maternity Centre awmna tlang hi ruahman a ni nghe nghe a, mahse Lungleiah sawn a ni leh ta a. Kum 1972-ah quarter leh Zirna In te sak chhoh a nih tak zelah chuan I.T.I Veng tia hriat a ni ta ber a. Kum 1978 khan Presbyterian Kohhran, Venghlui Pastor Bial chuan Preaching Station a rawn din ta a; chu chu Mualmawi Presbyterian Kohhran Preaching Station tih a ni. Tuna I.T.I Veng Presbyterian Kohhran Biak In dinnaa-ah hian Biak In Bawkte khawh a ni a, he mual hi a mawi thin khawp mai a, chumi chawi chuan Mualmawi Kohhran tiin chutih laia Venghlui Pastor bialtu Rev. Lalthanga’n a hming a sa a, hei hi Veng hming atan pawh hmangin, Mualmawi Veng tih a ni zui ta a. Amaherawhchu I.T.I Veng tih a lo nih thin avangin I.T.I Veng tih chu a reh nghal mai thei lova, hun a lo kal hret a, kohhran mal hming behchhana veng hming put chu remchang tawk lova hriatna a lo awm leh a, ITI Veng tih chu a lo ri ring tan leh ta a, chuvangin dt.23.3.82 zana Branch Executive, Pi Lalngeni Ina thukhawm chuan Branch thar hming atan I.T.I Veng Branch YMA ni rawhse tiin lungrual takin an pass a ni.

Kum 1976 bawr velah tawh khan I.T.I Mual Paho Committee din a ni a, he Committee hian tuna Republic field mual thleng hi a han huam a. Hruaitu pawh kumtin an inthlang thina, record mumal tak hmuh tur a awm tawh lova, hetih hunlaia Committee-a tel te hnen atanga hriat theih danin, Committee hruaitute zingah I.T.I Mual mawng lam pa ho viak a tha chho tial tial a, chutah Veng hrana din duhna a lo lian tel zel bawk a. Kum 1983-a he Committee-a Chairman-ah Pu P.Kapchhunga nia, Pu V.Lalzawmliana Secretary a nih lain sorkarah V/C hran an dil ta a, sorkar chuan kum 1984-ah min pe ta mai a, V/C ramri thenah I.T.I Mual Paho Committee-in a lo huam chin engemaw zat chu Republic Veng lamah rin luh an ni ta a. Hemi tuma V/C min pekna sorkar lehkha hi sorkar-in official-a kan veng hming atan I.T.I Veng tih a puanna hmasa ber a ni. Hetih laia I.T.I Veng ramri chu, Mualpui road lamah Pu K.Lalhmuaka In piah kawr chho hi ram ri a ni a, a bak zawng chu tuna ramri tho hi a ni. I.T.I V/C-in veng huam chhung zauh tura an nawrna avangin Mualpui panna kawngpui chin hnuai lam zawng chu I.T.I Vengah rin luh belh a nih thu dt.29.4.1994 khan sorkarin order a ti chhuak a ni. I.T.I Veng Village Council (1984) hmasa bera hruaitu te chu :-

President :	Pu Ralthanga Sailo (L)	Vice President :	Pu Zadailova
Member te :	Pu Chhawnlova MM(L)	Pu P.C Zairemmawia,	Pu F.Lalbuaia(L)(ruat seat)
	Pu P.Kapchhunga (mat seat),	Secrertary :	Pu Lalrova

Kum 1987 khan V/C House chu tuna a hmun ngaihah hian sak a ni a, a building hlui thiatin, Bialtu MLA, Pu R.Tlanghmingthanga, Minister, Social Welfare etc.-in MLALAD fund min pek hmangin nikum atang khan building thar saa bultan a ni ta a ni.

Republic Veng hmun dang te aia tla fual deuh bik a nih vang pawh a ni ang, in indan hma pawhin Veng hran ang maia inrelbawlna kalpui a awm nual a, kum 1980-a Section YMA din a ni a, Mualmawi Section Y.M.A O/B hamsaber te chu:- President : Pu R.Kapenga Vice President : Pu P.C Hranghnuna Secretary : Pu Vanlalringa Assist.Secy. : Tv. P.S Rokhuma Treasurer : Pu C. Lalzawmliana Fin. Secy. : R.Lalthankunga

Kum 1982, April ni 3-ah Section YMA chu Branch-ah hlankai a ni ta a, hruaitu inthlang zuiin, I.T.I Veng Branch Y.M.A O/B hmasaber te chu hengte hi an ni :-

President :	Pu V.Thangchuanga	Vice President :	Pu Laithangvunga (L)
Secretary :	Pu Vanlalringa	Asst. Secy. :	Pu R.Kaplhuama
Treasurer :	Pi C.Kapmawii	Fin.Secy. :	Tv. R.Lalrinmawia.

Mualmawi Section V.D.P chu Republic VDP Unit hnuiah a awm thin a, dt. 29.10. 1980 zanah hruaitu tura thlan chhuah mi 6 ten nihna hetiang hian an in ruat

President :	Pu Kapchhunga	Vice President :	Pu Kapzauva
Secretary :	Pu Vanlalringa	Asst. Secy :	Pu P.C Hranghnuna
Treasurer :	Pu Vanlallawma	Fin. Secy. :	Pu R.Kapenga

Dt.29.6.85 zanah Section V.D.P chu Unit-ah hlankai a ni a, hemi zan hian Mualmawi tih chu Veng hminga hman zui loh an rel a, chuvangin VDP Unit thar pawh chu I.T.I Veng VDP Unit an ti nghal ta a ni. Unit hruaitu hmasate chu :-

President :	Pu R.Thanseia	Vice President :	Pu Raldomana
Secretrary :	Pu F.Rokima	Asst. Secy. :	Pu V.Lalzawmliana
Treasurer :	Pu R.Manliana	Fin. Secy. :	Pu R.Lalthankunga

M.H.I.P, I.T.I Veng Branch pawh kum dt.15.10.1984-ah din a ni a, chuta O/B hmasaber te chu heng te hi an ni :-

President :	Pi Lalchhawni(L)	Vice President :	Pi Lianmawii
Secretary :	Pi R.Lalneihkungi	Asst.Secy. :	Pi Chhunkimi
Treasurer :	Pi Lalngeni	Fin. Secy. :	Pi Khawvelthangi

Kum 1985 khan MHIP In hmasa ber chu tuna an In hmun ngaiah hian an sa a, State Social Welfare Advisory Board atanga Cretche Centre (Nauawmna) an hmuh pawh hetah hian dt. 1.7.1985 ah an hawng a, diltu awm chhun, Pi Chhunkimi chu Cretch a thawk tur hian lak a ni. Pu Hipheia’n lanpuina sum a pekin MHIP In 1996 khan sak lhat a ni a, chumi hnuah Dr.C.Silvera MP-in Hall sakna a pe ve leh a, chu chu dt. 22.12.1997 khan a hawn a ni.

I.T.I Veng -ah hian Upa Pawl Unit a din hmain kum 1984 alanga 1988 thleng Pu L.Kamlova (L) President anga awmin Pu Zanawka’n Secretary hna a chelh chhova, Pu L.Kamlova a thih hnu kum 1989-ah hruaitu inthlangin mumal zawka din a ni ta a, chuta O/B hmasaber te chu heng te hi an ni :-

President :	Pu P.Kapchhunga	Vice President :	Pu Roliana (L)
Secretary :	Pu Khuangliana (L)	Asst. Secy. :	Pu Lalnghakliana
Treasurer :	Pu K.V.L chhawna(L)

I.T.I Veng Beutification Society chu 1992 khan mi thahnemngai te’n an din a, hruaitu hmasaber te chu hang te hi an ni :-

Predient :	Pu R.Kapeng (L)	Vice Chairman :	Pu H.Laldea
Secretary :	Tv. Lalnuntluanga Pachuau	Asst. Secy :	Nl.Lalthlamuani
Treasurer :	Pi C.Kapmawii	Fin. Secy.:	Tv. Lalchungnunga(Vala)

Dt.22.2.1995 khan Mizoram Hmeithai Asociation, I.T.I Veng Branch pawh a lo ding ve leh a, O/B hmasaber te chu heng te hi an ni :-

President :	Pi Lalropuii	Vice President :	Pi Chalkimi
Secretary :	Pi C.Kapmawii	Asst. Secy. :	Pi C.Lalnuntluangi
Treasurer :	Pi Lalngeni	Fin. Secy. :	Pi Mankungi

An ni hian Pu Lalthlamuana, MP sum pekin tuna an Building hi kum 1999 August khan an sa ta a, an In sakna hmun hi an hman tangkai theih chhung an hman theihna turin V/C-in ruahmanna a siam a ni.

Khawtlang mipui tana veng chhung hmun pawimawh zual leh thil thenkhatah pakai zui ila.

I.T.I Muala awm hmasa te’n Thlanmual hrang nei turin rilru an lo nei nghet hle a. Kan thlanmual hi a tirah chuan mimal ram a ni. A then Pu Rochhinga(L) Thakthing, a then Pu Lianzuala, Khatla leh Pu Lalthanghluana Republic te ram a ni. An ni hian an ram hi khawtlang hruaitute ngenna leh nawrna avangin thlanmual atan pe a ni. V/C hran kan neih hma daihin thlanmual kan neih theih na turin, lo awm hmasa te’n theih tawp an chhuah a, a sulsutu ber pawh Pu C.Thanchungnunga (L) a ni. A ni hi 1975 May thla-ah a boral a, hriat theih danin a ni hi puitlingah chuan kan thlanmuala lu nghat hmasaber a ni ta nghe nghe a; hetih lai pawh hian thlanmual ram atana tihfel engmah a la awm chuang lo, mahse neih ngei tumna a len em avangin an phum mai a ni. Hemi hnu hian khawtlang hruaitu te’n hma an la chhun zawm ngar ngar a, harsatna tam tak an su tlang a ni. Kum 1985-a YMA hruaitu zinga ka tel tirhin, Revenue Director office-ah Thlanmual ram chungchang-ah kan hruaitute hnung ka zui ve a, mimala ram nena ramri a fel hlei thei lo, pass pawh kan nei thei lawk lo a ni. LSC mumal tak kan neih kum phei chu 1990 khan a ni ta chauh a ni.

I.T.I Veng pa ho te’n kan Venga Primary School hawn a nih theih nan hma la tu tur, adhhoc committee 21.1.1980-ah an din a, Pu Belliana(L) chu Chairman niin Pu Kapzauva chu Secretary a ni. He Adhoc-committee hi a ding rei lo, a tuk 22.1.1980-ah V/C te nen sawi hovin committee pangngai an din nghal a, VCP, Pu Lawmthanga Colney chu Chairman a ni. Kar khat hnu maiah Republic Veng Primary School III chu Pu Bellian(L) inhnuaiah 28.1.1980-ah hawn a ni a, hemi hnu lawk hian tuna a awmnaah hian school building sak zui a ni a, hemi kum vek kum tawp lamah luahzui nghal a ni. 1985-ah I.T.I Veng Primary School tih a lo ni ta a ni. Head Teacher hmasaber chu Pu Lalrinliana a ni.

I.T.I Veng Private Middle School chu dt. 2.2.1987 khan I.T.I quarter, MSATI atana hman zui tak-ah khan hawn phawt a ni a, YMA Hall hmunah hian Middle School tur, a chung rangva, a bang dapin sak zui nghal a ni a, sak zawh veleh insuan luh a ni. Pu Chhawnlova, M.M chu Managing Board Chairman a ni a, Headmaster hmasaber chu Pu R.Vanhlira, B.A,B.P.ed a ni. Middle School hi 1.1.1994-ah provincialised a ni. Thlanmual ram bul, Pu L.Thanghluana ram chu Middle School hmun atan khawtlang hruaitute’n an dil a, a ni chuan a lo pe a, hetah hian 1990-ah school building sak zui nghal a ni a, kum 1991-ah Y.M.A Hall aJanga insuan luh a ni ta a ni.

A kum leh mai 1992 January thla-ah V/C-in vantlang inkhawm kovin Private High School din rem tih tlan a ni a, hemi kum vek June ni 11-ah, chutih laia Edn. Minister Dr. H.Thansanga’n a rawn hawng a, High School atan Mizoram Home Guard bahrik pahnih luah phawt a ni. Heta Jang hian Pu Vanlalzawma’n MP(LS)-in fund min pek hmangin High School building hran sak a ni a, 2003 April-ah luah a ni. Sorkarin kal phung a thlak avangin dinhmun Jha neih a har hle a, tun thleng hian Private status-ah a la awm ta a ni. Private High School Managing Board Chairman hmasa ber chu chutih laia VCP, Pu Chhawnlova MM (L) a ni a, V.C Secretary Pu Zanawka chu Secretary a ni. Headmaster hmasaber chu Tv. Vanlalzuata M.A a ni. Managing Board hi siam Jhat zui leh thuai a ni.

Kum 1995 June khan Social Welfare Department-in Anganwadi Centre-I min rawn hawn sak a, tah chuan Nl. Lalpani a thawka, tuna a awmnaah hian Centre sak a ni a, kum 2006-ah khan sorkar suma sak Jhat a ni leh ta a ni. Kum 1997 khan Anganwadi Centre-II hawn a ni leh a, Pi Lalrammuanpuii (Lateii) Worker atan lak a ni a. Pu Vanzika inah Centre II hi hawn phawt a ni a, chumi hnuah Pu TC Hmunliana inhnuaiah insawnin, kum 2005-ah tuna a building thar, sorkar Janpuinaa sakah hian an insuan leh ta a ni.

Tuna kan Y.M.A Hall sakna hmun hi kum 1982 khan a ruak a ni tih Pu P.C Rosiama(L) chuan Y.M.A President Pu V.Thangchuanga a hriattir a, chuveleh Republic V/C hriatpuina lain hemi kum vak kum tir lamah Community Hall-cum- Indoor Studium atan Y.M.A hmingin sorkarah dil a ni. LSC pawh YMA hminga siam niin kum 1984 December-ah lak chhuah a ni. Kum 1985-ah Hall Building Committee din a ni a, chuta hruaitu hmasa te chu heng te hi an ni :-

Chiarman :	Pu Ralthanga Sailo, VCP	Vice Chairman :	Pu V.Thangchuanga
Secretary :	Pu R.Kapenga	Asst. Secy. :	Pu H.Vanlalrawna
Treasurer :	Pu V.L Mawia	Fin. Secy. :	Pu M.I Singh (PK Singson)

Kum 1986-ah Hall sak bultan a ni a, V/C atanga pawisa hmuh hmanga bul tannin, mipuiin rawra an thawh khawm a, hnatlang vawi tam tak neih a ni. Hall sak tak tak hmain, tuna Chawkidar quarter awmnaah hian in, a bang dap leh a chung rangva-in Middle School pindan pathum neia sak a ni a, hei hi a tul dan azirin YMA-in a hmang ve a, YMA inthlante pawh hetah hian neih ve a ni. Hall sak nan hian sum hmuh a har sa hle a, a sak pawh kan sa rei a ni. Kumin hian R/D ajangin Rs.Nuaih 5 pek akn ni a, bul tan atanga kum 20 hnuah kan sa zo thei ta chauh a ni. YMA Hall hi a changing Community Hall ti turin sorkarin min ti a, chutianga kan han tih chang pawh awm, amaherawhchu kumin hian YMA Hall tih chiang taka tar chhuah lungrual takin kan lo rel thlu leh ta a ni.

Kum 2001 khan Pu Hiphei, MP(RS) in MPLAD atanga pawisa min pek hmangin YMA RUN ( Library-cum-godown) hi sak a ni a, Thlanmuam In thar sak a ni bawk. YAM Run hi dt.28.12.2001-ah Pu Hipheia’n min rawn hawn sak a ni.

Bialtu MLA, Health Minister ni bawk, Pu R.Tlanghmingthanga hmalakna azarah Maternity Centre-cum- Urban Health Centre chu dt.26.8.2007 khan hawn a ni a, Bialtu MLA hian a rawn hawng ni. Damdawi In hi khum 10 hun theihna tura tih a ni.

Sawi tawh angin I.T.I Venga Kohhran ding hmasa ber chu I.T.I Veng Presbyterian Kohhran a ni a, he Kohhran din a nih theih nana inkhawmna hmasa ber chu Pu Kapzauva In-ah dt. 2.10.1976 Inrinni zanah a ni. Republic Kohhran chhung a nih avangin heta inkhawm hrang tan hian mawhphurtu a ruat a, chungte chu Pu L.Kamlova (L), Pu P.C Rosiama (L), Pu R.Manliana leh Pu Kapzauva te an ni. Kum 1978-ah Preaching Station-a puan a ni a, Biak In Bawkte chu tuna I.T.I Veng Kohhran Biak In hmunah hian a chung Di, a bang Dap-in sak a ni a, dt.5.2.1978 Pathianni Chawhnuah luah tan a ni a, hei hi I.T.I Venga Biak In ding hmasa ber a ni. Preaching Station hi dt.28.10.79 (Pathianni)-ah Kohhran puitlinga hlankai a ni.

Mualpui-ah Police hmunpui dah a nih dawn avangin 1989-ah Mualpui kawng laih a ni a, kawngpui a tlang hlim, kum 1990-ah Mualpuiah Elbethel neih zui a ni. Hetia kawng a tlang veleh hian quarter leh in pawimawh dangte sain kum 1990-ah police an rawn awm tan a, hemi kum hian I.T.I Veng Kohhran hmalaknain Pu Ramhaia (L) MAP, quarter-ah Mualpui a mite an inkhawm hrang a. Biak In hmun te ngahtuahin an sa zui nghal a. Biak In thar chu dt.21.11.1991 -ah Republic Bial Pastor, Rev. Robawiha’n a hawng a ni. Mualpui kohhran din tur hian Republic leh I.T.I Veng Kohhran te’n sul an su a, amaherawhchu Mualpui Kohhran hi pawl bik kohhran nilovin pawl hrang hrang tana Kohhran din a ni. Kum 1998 alang khan Mualpui Kohhran hi Presbyterian kohhran inrelbawlna atang chuan Venghnuai Pastor Bial chhungah dah a ni a, chu chu Kohhran dangte pawhin an zawm zui ve a; hei vang hian Mualpui lamah mitthi an awm chuan Salem Veng lama Kohhran hruaitu te’n serh leh sang tun thleng hian an khawih zui ta zel a ni.

I.T.I Veng Kohhran ruahmanna bawkin I.T.I Vengchhak Kohhran din a nih theih nan dt.19.2.2000 khan Pi Zaluti(L) inluahin Inrinni zan apiangin inkhawm hran a ni a, dt.4.6.2000-ah Preaching Station-ah puan a ni. Hemi hnu dt.26.11.2000-ah Kohhran puitlingah dah a ni a, tuna an Biak In hi dt.27.3.2002-ah hawngin an luah tan a ni. I.T.I Vengchhak Kohhrana hruaitu hmasa te chu:- Chairman : Upa Kapzauva, Secretary : Upa R.Lalthankunga,. Asst. Secy. : T/Upa V.Lalzawmliana, Treasurer : Upa Vanlallawma te an ni.

Isua Krista Kohhran Biak In, Taitesena Section ami-ah hian Rublic lam te pawh an lawi avangin I.T.I-Republic I.K.K Kohhran tih a ni. Kum 1976-ah Pu Zadailova Inah inkhawm tanin Venghlui I.K.K Kohhran hnuaih an awm a. Tuna an Biak In hmunah hian mimal in a ding thin a, chu chu Biak In atan an luah leh a, a neituin Biak In hmunah a pe zui a, mimal ram lei belhin Biak In an sa chho ta a ni. An Kohhran hruaitu hmasa te chu ;- Chairman : Pu Kawlhnuna, Secretary : Pu Liandinga, Treasurer : Pu Zadailova te an ni. I.K.K, Republic-I.T.I a|ang hian I.K.K ( Kross sen ) inla hrangin an inkhawm hrang a, chumi hnuah Church of Jesus Christ (CJC) invuah te chu I.K.K, Republic-I.T.I a|ang bawk hian inla hrang ve lehin, Pu Vankunga Inah an inkhawm a. Kum 2001-ah C.J.C leh I.K.K (Kross sen) te hi Isua Krista Kohhran (I.K.K) invuahin an inchhungkhawm a, tunah chuan Pu R.Tlanghmingthanga In, Sikul Maul a mi Biak In atan an luah mek a ni.

United Pentecostal Church, I.T.I Veng inkhawmna hmasa ber chu kum 1984 khan Pu Lalmanga inah neih tan a ni a, College Veng UPC hnuaiah bultan a ni. YMA Hall bulah mimal ram leiin Biak In an sa a, chu chu kum 1986 June thla-ah an luah. Kum 1995 May thla khan U.P.C, North East India leh U.P.C, Mizoram-ah an inthen a, UPC(Mizoram)lam chu Pu Lalhmachhuana (I.T.I qtr.) Inah an inkhawm hrang a, tunah chuan I.T.I Veng MHA building Biak In atan an luah a, an hruaitu hmasa te chu:- Chairman : Pu Nghakliana, Secretary : Pu C.Chalchhunga(L), Treasurer : Pu C.Lalduhawma te an ni. UPC(NEI) lam chu Pu Thanghuama inah an inkhawm a, tunah chuan Pu Lalhlua in chu Biak In-ah an luah a ni. An kohhran hruaitu hmasa te chu ;- Chairman : Pu Thanghuama,Secretary : Pu Biaksailova, Treasurer : Pu Thangkima te an ni a,

Chhandamna Sipai Pawl, I.T.I Corps hi a tirah chuan Society din turin dt. 12.2.1984-ah Republic Corps atangin I.T.I Recreation Hall-ah an inkhawm hrang tan a, dt 1.5.84 khan Society-ah puan a ni a, dt.26.4.89-ah Corps puitlingah hlankai a ni. Maj. Sawichhunga, Regional Commander lo kalin a rawn puang a ni. Tuna an Biak In awmnaah hian an Biak In hmasa ber chu dt. 26.4.89 khan an luah tan a, tuna an Biak In hi chu dt.4.2.2007 khan an General, Commissioner Shaw Clifton- in a hawng a ni. I.T.I Society hruaitu hmasa te chu : Corps Sergeant Major(CSM) : Pu Laltluanga Sailo, Corps Secretary :Tv.Ngurchhinga chumi hnuah Pu Rosiama, Corps Treasurer :Pu Thanghluna a te an ni.Corps puitling a nih hnua hruaitu hmasa te chu : CSM : Pu Lungtiawia, Corps Secretary : Pu Vanlalringa, Corps Treasurer : Pu Thanghluna te an ni.

Baptist Church of Mizoram, I.T.I Veng Kohhran hi Republic Baptist Kohhran atanga indangin a hawnna inkhawm YMA Hall-ah dt. 9.6.96 khan neih a ni a, hemi hnu dt.11.6.96 atangin MASTI Drawing room-ah an inkhawm hrang Jan a, tuna an Biak In hi February,1998-ah luah in dt.1.10.98-ah Rev. C.Ro(huama, Executive Secretary-in a rawn hawng ta a ni. An kohhran hruaitu hmasa te chu :- Chairman : Upa Chalsiama, Chairman (Elect) : Pu Hrangdailova, Secretary : Pu C.Lalbiaka, Treasurer : Pu Sailothanga, Asst. Treasurer : Pu Khawlthanga Sailo te an ni.

Holy Trinity Church, Roman Catholic chuan tuna Holy Trinity School awmnaah hian mimal in leia chei thain dt.14.6.1992 atang khan an inkhawm tan a, hemi hma hian Republic Vengah mimal inah an inkhawm hmasa a ni. An hruaitu hmasa te chu ;- Leader : Lawrence Rualkhuma, Asst. Leader : Jerome Sawilaia, Secretary : Patrick Pazawna, Treasurer : Paul Thangzika. Tunah chuan School buildingah an inkhawm a, Republic leh College Veng atang pawhin an rawn lawi a ni.

Seventh Day Adventist Church hi Upper Republic Kohhran atanga indangin, 11.7.2006 atang khan Pu Laltanpuia te inah zan lampang chuah an inkhawm hrang a. 12.3.2010 atanga 2.4.2016 Pi Sangtei in hnuaiah an inkhawm leh phawt a, chuan tuna an biakin awmnaah hian 21.5.2015 atang khan an sa tan a, 16.4.2016 atangin an luah tan a ni. An hruaitu hmasa te chu:-  Leader : Laltanpuia, Treasurer : Khianglianthanga, Secretary : HT.Lalmawizuala te an ni.

I.T.I Veng chhunga awm Lawibual, Zolawra Picnic Spot, LAD Picnic Spot, 3rd Bn. MAP Hqrs. leh Veng hminga kan chawi, Industrial Training Institute te avangin kan Veng hian mi hriat a hlawh hle a, amaherawhchu kan khawtlang hruaitute thawhhona tha tak leh veng mipuite tanrual vanga kan hming thatnate hian a tilar nasa a ni tih hi ka sawi tel duh a, chhuanawm ka ti a ni. I.T.I Veng Beutificaton Society (IBS) hmalakna avangin kan Veng hian mi hriat leh fak a hlawh. Dt.13.12.2005 khan ASEP chuan thing leh nungcha humhalh kawnga hna thawh that vangin chawimawina a pe a ni. Kum 2002, 2003 leh kuminah hian LAD buatsaih, Aizawl khawpui Veng fai inelna-ah Pakhatna dinhmun kan hauh a, tum dangah pakhatna kan nih loh pawhin top-3-ah kan tel rawt a ni. Chutiangin pawl dang leh mimal, kan veng tihming thatu an awm bawk a, tun tumah hian sawi vek sen a ni lovang.

I.T.I Veng hi a thang duang hle a, tunah chuan Aizawla Veng lar leh hming tha, veng lian tak pakhat a lo ni chho ve ta mek a ni.

Source: Baibel (YMA ITI Branch Silver Jubilee Souvenir)

BRANCH YMA, ITI VENG
OFFICE BEARERS 2023

• 

• 

• 

• 

• 

•